Betanzos encamiña a adquisición da Casa Gótica case dúas décadas despois do seu desmantelamento

O Concello de Betanzos está preto de culminar o proceso para recuperar un dos edificios máis emblemáticos do casco histórico: a Casa Gótica. Así o anunciou a alcaldesa, María Barral, quen explicou que o inmoble, considerado a vivenda máis antiga de Betanzos, poderá pasar a ser de titularidade municipal grazas ao procedemento de execución forzosa tramitado a través do Servizo de Recaudación da Deputación da Coruña. Este paso permitirá despois afrontar a súa rehabilitación e destinala a usos públicos.

Segundo relatou a rexedora, nas últimas semanas déronse "pasos moi importantes" nun expediente no que o Concello leva traballando desde hai anos para tratar de recuperar este inmoble do século XV, que permanece en ruínas desde o seu desmantelamento no ano 2007. A alcaldesa recordou que ao longo dos últimos anos o Concello explorou diferentes vías para obrigar á propiedade a reconstruír o edificio. Entre elas, actuacións xudiciais, expedientes urbanísticos ou a execución subsidiaria das obras, que chegou a saír a licitación no ano 2021, aínda que o concurso quedou deserto.

A última vía aberta foi a través do Servizo de Recaudación da Deputación da Coruña, co obxectivo de cobrar tanto as multas impostas ao propietario como os gastos asumidos polo Concello para garantir a seguridade do inmoble, dos peóns e das edificacións colindantes. Segundo explicou Barral, unha vez esgotado o procedemento e ante o impago voluntario da débeda, a Deputación solicitou ao Concello un informe no que reflectise se tiña ou non interese para a adquisición do inmoble. Os servizos técnicos municipais emitiron xa os informes preceptivos, favorables, que avalan a utilidade pública da incorporación da Casa Gótica ao patrimonio municipal.

Os informes foron remitidos á institución provincial coa vontade de asumir a titularidade do inmoble para que continúe a tramitación da adxudicación e que Betanzos incorpore para o seu patrimonio público un dos seus edificios máis simbólicos, abrindo a porta á súa rehabilitación tras case dúas décadas de abandono. A alcaldesa destacou que este paso supón "un fito para a cidade", xa que o edificio pasará a ser de titularidade pública. "É unha gran noticia para Betanzos porque por fin vemos cerca unha solución", afirmou, incidindo en que o Concello poderá asumir a recuperación e rehabilitación do inmoble unha vez se complete a súa adquisición.

O goberno local baralla distintos destinos para a Casa Gótica, entre eles a instalación de servizos municipais; servizos vinculados ao Camiño de Santiago, ou a creación de vivendas de uso público, aínda que a decisión definitiva adoptarase despois de conseguir a financiación necesaria para acometer a rehabilitación.

No apartado económico, Barral explicou que a normativa fixa que o valor da adxudicación non pode superar o 75% da tasación do inmoble. A valoración actual da Casa Gótica é de 27.881 euros, polo que o importe da adxudicación ascendería a 20.910,75 euros. Esa cantidade non suporá un desembolso para o Concello, xa que se descontará da débeda que a propiedade mantén coa administración local, cifrada actualmente en 37.863,88 euros entre multas e outros conceptos. O resto da débeda continuará reclamándose por parte do Concello a través da Deputación.

Elaborado a partir da información publicada por laopinioncoruna.es.