As infantís do Santo Domingo gañan 72-56 ao Estudiantes Lugo na primeira vitoria na casa do feminino do club

O infantil feminino de Warnier Informática do Santo Domingo Betanzos segue sumando na súa primeira tempada en Primeira División. Despois de estrearse cunha derrota ante o Básquet Coruña e de equilibrar a balanza na pista do Calasanz, o sábado gañou 72-56 ao Estudiantes Lugo Río de Galicia no pavillón José María Valeiro «Tocayo», no partido que o club sinalara como o destacado da fin de semana.

Segundo o club, o marcador «non reflexa a igualdade que se viu no parqué». O adestrador, Javier Codesido, valorouno así: «Primeira vitoria na casa na historia do feminino do club ante nada menos que Estudiantes Lugo. Partido durísimo e intensísimo onde o Santo foi quen de gañar mercé a un grande esforzo defensivo colectivo para parar as talentosas xogadoras visitantes. Malia o resultado, o partido foi moi igualado de principio a fin».

Tres vitorias e unha derrota no resto da canteira

Nunha xornada na que descansou o primeiro equipo e na que varios conxuntos do club aínda esperan polo seu debut en liga, estes foron os demais resultados:

• Cadete feminino Decornaveira (Javier Codesido): vitoria 33-87 na pista do Compañía de María B. Para o técnico, foi un partido que «non tivo historia e no que se fixo rotación de todas as xogadoras para cando veñan rivais de nivel superior»; o equipo «venceu claramente en todas as facetas do xogo na estrea de moitas delas».
• Júnior masculino (Antonio Díaz «Doc»): 90-71 ao Golfiños Sada no duelo comarcal. Os sadenses, segundo o club, aguantaron ata o terceiro cuarto.
• Júnior feminino (Javier Cotelo): vitoria clara, 64-50, ante o Compañía de María.
• Infantil masculino (Diego Folla): o único resultado en contra, 44-65 ante o Arteixo o sábado pola mañá. Os betanceiros só puideron aliñar a sete xogadores polas ausencias e, segundo o club, deron a cara durante bos tramos do encontro.