O telón de Camilo Díaz Baliño do Alfonsetti, coas sinaturas dos artistas no reverso, será restaurado

A alcaldesa de Betanzos, María Barral, e o presidente da Fundación L. Monteagudo, Alfredo Erias, asinaron este xoves un convenio de colaboración para restaurar o telón de fondo do antigo teatro Alfonsetti, unha peza de gran valor histórico que se gardaba nos almacéns do Museo das Mariñas.

A fundación asumirá todo o financiamento e a execución dos traballos, desde a redacción dos proxectos técnicos ata a contratación de especialistas. A intervención partirá da proposta técnica de Crea Restauración, cun orzamento de 23.281,49 euros co IVE incluído, e necesita os informes e as autorizacións da Dirección Xeral de Patrimonio Cultural da Xunta.

Unha obra de Camilo Díaz Baliño

Segundo o Concello, o telón é obra de Camilo Díaz Baliño e encargouno o propio Concello a comezos do século XX, probablemente na década dos anos vinte. Díaz Baliño foi pintor, debuxante, cartelista, escenógrafo e escritor, estivo vinculado ás Irmandades da Fala e ao movemento galeguista e foi pai de Isaac Díaz Pardo, impulsor de Sargadelos. Foi asasinado en 1936, ao comezo da Guerra Civil.

A peza garda ademais un detalle singular: no reverso figuran as sinaturas de numerosos artistas e actrices que pasaron polo escenario do Alfonsetti, unha testemuña directa da vida cultural que acolleu o teatro.

Enrolado e nun estado delicado

O telón está pintado a pincel sobre tea, cunha estrutura de listóns de madeira. Na actualidade atópase enrolado e nun estado de conservación delicado, polo que precisa unha intervención especializada para garantir a súa estabilidade e que se poida volver contemplar.

Unha vez restaurado, colgarase nunha das paredes do Cine Alfonsetti, xa que, segundo o Concello, tecnicamente non é posible colocalo no seu lugar orixinal.

Un convenio aberto a outras pezas

O acordo crea unha comisión mixta de seguimento, con representantes das dúas partes, que velará pola súa execución. Está concibido como un convenio marco, polo que no futuro poderá incorporar outras pezas do patrimonio municipal que precisen actuacións similares.

É o primeiro convenio que o Concello asina coa fundación. A alcaldesa destacou que «seguramente abre o camiño a futuras colaboracións» para recuperar e poñer en valor o patrimonio local, e agradeceu a Alfredo Erias o seu compromiso co proxecto. A Fundación L. Monteagudo constituíuse en 2013, foi clasificada de Interese Cultural Galego en 2014 e ten entre os seus fins a defensa, a conservación e a divulgación do patrimonio cultural galego.

Elaborado a partir da nota de prensa do Concello de Betanzos.