Betanzos HB lamenta a morte dun traballador na súa fábrica de Requián

A empresa Betanzos HB confirmou este martes que o traballador que morreu o luns nun accidente laboral en Requián faleceu dentro da súa fábrica. Fíxoo a través dun comunicado publicado no seu perfil de LinkedIn.

«Lamentamos profundamente o falecemento dun traballador dentro da fábrica, ocorrido onte día 5 de outubro», sinala a empresa, que traslada «as nosas máis sinceras condolencias e o noso apoio á súa familia e seres queridos». Betanzos HB agradece tamén «a rápida intervención dos seus compañeiros e servizos de emerxencia».

A compañía explica que a súa prioridade nestes momentos é acompañar á familia e ao seu persoal, ante unha perda que, segundo indica, lle afecta «profundamente como empresa e como equipo humano». O comunicado remata agradecendo a comprensión, as mostras de solidariedade recibidas e o respecto á privacidade das persoas afectadas.

BetanzosHoxe contactou coa empresa, que se remite a ese comunicado.

O 112 Galicia recibiu o aviso ás 16:15 horas do luns. Segundo a información inicial do centro de emerxencias, o traballador fora atropelado por unha carretilla. Mobilizáronse Urxencias Sanitarias de Galicia-061, os Bombeiros de Betanzos, a Policía Local, a Garda Civil e Protección Civil, pero o persoal sanitario non puido salvarlle a vida.

Por respecto á familia, BetanzosHoxe non publica a identidade do traballador.

Elaborado a partir do comunicado de Betanzos HB e da información do 112 Galicia.